May 16 : SihNa Pan NunTak Na ThakAh

Lai at : Masaaki ( Japan  pan )

                 Misi luang sil nasep sem ka hihman in Japan gam ah nisim in misi om ci in sihvui na le han te ah nasem in ka buai den hi.  Kum tampi sung sih na hang a adah akap te leh asi sa te lungnuam tak aa suahtak na ngah aa a pai theih nang un thupha piak na, biak na tawh kisai hunbawl na  tuamtuamte ka en den hi.

Kha te kihta (lau)

                Japan gam in leitung nopsak na tawh kidim in thunget sak na tawh a sisa pi leh pute pahtawi na ki nei in, kithoih kipai na tuamtuam te ki  nei hi. Mi atam zaw in thakhat thu in a tun na ding mun uh tung pah lo in kaal 7 sung a kha uh a inn vuah om lai hi cih um uh hi. Tua hun sung a sisa kha te in mawhsak na a thuak khak ding uh lau in kua mahin inn lawi ngam lo uh hi.  Tua hunsung teng in innkuan pih te in a sisa te akha uh gam nuam a tuntheih nang in biakpiak na tuamtuam bawl uh hi. Gam nuam a tun theih nang in mihing, ganhing a hih kei leh lungno khat peuh zuak in a nuntak nang un midang te tung ah bel kik hi cih up na nei uh hi.  Mi atam zaw in vantung gam a tan nang un a tawp khak na ah na hoih asepma in din khawl zel uh hi.

Sihkhit ciang koi lam ah

                Biak na tuamtuam te sihvui biakpiak na tuamtuam te ka en aa, atam zaw sihvui hunbawl na ah dahna kah na lianpi te om in ahihhang Khristian te dah na ah hehnep na le lamet na amau te aa ding om lai ahih lam ka phawk hi. Asi sa a it te uh tawh khatvei ki mukik ding cih up na nei uh hi. A tamzaw mite in tua bang lamet na nei lo uh hi. Ka neu aa kipan ka khan pih up nate leh  Khristian te upna ki lamdan nate nak pi in ka kan kik hi.  Khristian te in sih na pan   Pasian sung ah upna tawh do do uh hi. Amau te ii Pasor pa in a dah akap te hehnem in amau te a ding in lamet na om lai ahih nate  gen in thapia hi.

                Nikhat Adventist  biakinn sung ah sihvui ding khat ka makaih aa, sep ding teng ka sep khitteh kei bek biakinn sung ah ka tu hi. Lungnop na in kei tung ah puan bang in ong tuam in, tuihual pi in ong vat tum mang dektak hun le a lipkhap huai tuahsiat nate ka ngaihsun hi. Linggawp aa lau ding sang in lungnop na kasung ah ong dim zaw in kei bek ka hih lam ka kiphawk hi. Tuazawh ni tawm no khit ciang in Zeisu ka mangmat hi. Ama thu ngaihsun in ka om aa ka ih mu kik thei nawn kei aa, Pasian thu tampi ka ki kum uh hi. Zeisu in ka nuntak na ong deih ahih lam Pastor pa in ong thei sak hi.

                Khristian te ngei na le tatzia te ka sintheih nang in Zeisu kiang thu ka ngen hi.  Khiristian te upna in a maute bang te bang in upna guan hiam? cih ka thei nuam lua  hi. Bangmah theih nei lo kahih man in akipat na pan kasin hi. Amah tawh a tawntung aa nuntak khawm theih na ding in hih leitung ah vantung leh leitung a bawl pa ong paisuk ong nung ta in eite mawh na hang in ong sih nate ka sin ciang in lamdang kasa hi. Tua bang te kaza ngei kei hi.  Abei sa ka mawh nate ka ngaihsun aa ka mawh nate ong maisak nang in Zeisu kiang ah thum thei in, Ama kiang ah ong sang kik ahih man in ka lungdam mahmah hi.  Piangsak pa Pasian tung ah amasa pen in thu ka ngen  aa ka theih ngei loh lungnop na ka sin sung ah kidim hi.

Up na hawm sawn

                Bangci bang in ka innkuan pih te kiang ah ka up na hawnsawn ding cih ka thei cian kei hi. Tua ahih man in bang mah kagen masa kei hi. Asawt loin bang mah gen ding nei lo ka hih lam ka kiphawk hi.  Ka nuntak na ki khel ahih na mu uh aa, lungnop na ka mai ah tang in ka kampau na ah zong ki lang hi. Zudawn nawn lo ka hih lam ong thei uh aa , a dang gamtat hoih lo teng zong paai khia khin ka hihlam mu uh  hi. Lamdang kasak khat ah ka innkuan pih te in kei ong panpih tek uh hi. Ka ki tuiphum na ah ong pai uh aa Pasian sung ah a thak upna ka neih na hang in kei tawh lungdam khawm uh hi. Ka lawm ka gual in zong ka ki lamdan nate mu in a koi cidan hiam? ci in ong dong uh hi. Anung ta Pasian Zeisu tawh ka kimuh  nate kagen aa, Ama ong piak letsong ahi Gupkhiat na man ngen lo in ka san lam ka gen hi.

                Tu in Khristian ahilo siahuai na anei mite in ka nuntak na ii ki lamdan nate, a dah kap innkuan te in ong thei ta uh hi. Mipawl khat te in zong ong thei ta uh aa, “bang in ong ki lamdang sak hiam? “ci in ong dong uh hi. Khristian khat ka hih na thu ka gen aa Pasian in kei lungnop na ong pia hi ci in ka gen hi. Midang te in ka up na ong dot ciang in hoih tak ka gen theih nang in  laisiang tho ka sim beh hi. Nisim aa ka muh adah kap te innkuan bangci bang in tha pia ding cih ahoih zaw in ka theih nang in ka sin hi.