SINNA 3 April 11 - 17 ZEISU KHAZIH KUA HIAM?

NIPINI (Sabbath) Nitak lam Apr. 11

SIM DINGTE: Luke 4:16-30; Luke 6:5; Eph. 1:3-5;
Luke 9:18-27; 2 Pet. 1:16-18.

KAMNGAH: Zeisu in, “note in kei kua hi nong ci uh

hiam?” ci in adot ciang in Peter in, “nang mah
in Pasian’ Khazih na hihi” aci hi. (Luke 9:20).

Zeisu Khazih kua hi mawk hiam? Hih pen “khel dot”

thu hi lo hi. Mihing ih cih kua hi mawk cih vai tawh kisai

thubul ahihi. Athupi zaw lai ah, mailam ciang bang piang

in bang tuak ding cih thu hi lai hi.

Zeisu nasep hoih sa in, athu thupi sa in, alungduaina

phat in, ama lungmuanna vai panpih in, ama dinmun zahtak

in, ama angsung khual lohna thupi sa in, asih zia lamdang

sak huai hi. Mi tampi te in Zeisu pen mi dik mi hoih khat,

thumann thutang mi, ki lawm ki tuak a genna hawmna anei,

cinate adam sak, thuak siatna te ah hehnem siampa khat

bang in sang ding uh hi.

Hi mah hi. Zeisu pen sia siam pen, makai siam

mahmah, mi lungsim thei siam, mihing nuntakna atelsiam

zong kici mai thei hi. Hi bang teng bek ban ah tampi hi lai hi.

Hih thute khempeuh in “kei kua hi hong ci na hi uh

hiam?” ci a adotna dawnna nang in cing zo nai peuhmah lo

hi (Luke 9:20, NKJV).

Hih pen dawn akul dotna ahihi. Hih dawnna tung

ah ih mailam thu teng kinga hi.

NIMASANI(Sunday) Apr. 12

Mite’n Zeisu Koici Ngaihsut (Luke 4:16-30)

Lungdamna thubute leh Laisiangtho thak sim in.

Zeisu in bang sem a ama kua hi mawk cih a up huai zolo

tampi om thei ding hi (ama nasep pen amah kua ahih tawh

akizom ahihi). Amah Pasian hi a honpa zong hi in, Amah lo

buang tawntung nuntakna lampi dang om lo hi. Hih thute

ih ngaihsut cian kisam a mi khempeuh ading in luang leh

ban vai ahihi.

Luke 4:13-16 sim in. Mite bang hang a tua cih tat

uh hiam? John 3:19 zong sim in.

Zeisu khuapihte’n Zeisu muh ding lawp mahmah uh

hi. Na lamdang tampi bawl khin a Nazareth ah hong ciah

hi. “Agen alamdang thute hang in lungmang uh hi.”
(Luke 4:24, CEV). Amaute khialhnate agen ciang in lehtat uh hi.

Luke 7:17-22 sim in. Zeisu vai John in adot sak

bang hiam? Bang hang a dong hi ding hiam?

Tui phumpa John, Zeisu lampi ding abawl sak,

“Pasian tuuno” ci a atangkopa na ngawn in asung tawng ah

lunghei nei veve lai hi. John theih nop thu pen, “hong pai

ding acih pa na hi hiam?” (Luke 7:19, NKJV).

Zeisu in John dotna dawng lian lo sawnsawn hi.

Ahihna teci te ahi asep abawlna thute genn in: “khebaite

lam pai a, aphakte’n damna ngah in, bengngong te’n khua

za uh a, misite tho in, mi zawngkhalte kiang ah lungdamna

thu kitangko hi (aneu 22, NKJV). Zeisu in John dotnate

adawn kisam lo zong ci kha mah ding hi. Asep abawlnate in

ahihna lak khin zo hi.

Thu khat pan in Zeisu dawnnate in John patau sak

thei zawlai ding hi. John ngaihsutna pan, Zeisu in tua te

hih thei ahih leh ken thong inn sung ah bang tuak mawk ka

hi hiam? Hih bang vai ah lamdang asa lo tawm mahmah

ding hi. Pasian in vangliatna khempeuh nei ahih leh, ken

bang hang a hih teng tuak? Bang hang in singlamteh leh

hong kamciamte in dawnna dik tak hi lian mawk hiam?

NINIHNI (Monday) Apr. 13

Pasian Tapa (Luke 1:31, 32, 35)

“Mihing Tapa” leh “Pasian Tapa” cih minte pen

lungdamna thubu sung a Zeisu agenna ah azat minte ahihi.

Amasa pen in Zeisu pen mi bang a hong piang Pasian

cih lak hi.

Anih na in thumgawm Pasian khat lak a anihna

agenna ahihi.

Hih te gel in Pasian leh mi ahi khawm Zeisu Khazih

alamdanzia hong lak minte ahihi. Telsiang ding baih lo hi.

Atelsiang hakna in mi leh Pasian ahi Zeisu pen lametna lianpi

hong piapa ahih lam hong ngaihsun thei sak hong suak thei

zaw hi (Luke 1:31, 32, 35; leh Luke 2:11 sim in). Hih munte

in Zeisu pen kua ahih takpi lam hong gen hiam?

Luke 1:31, 32 sung a vantung mi in, “ZEISU,” “sang

pen Pasian Tapa,” David tokhom “Topa Pasian in apiak ding

pa” ahihi (NKJV). Zeisu in Pasian Tapa ahihi. Amah in

Khazih, Messiah (teltuampa) David tokhom akip sak kik ding

pa ahihi. Amah in leitung kumpi khat hi bek mawk lo in

Pasian tokhom atuh nuam Satan azo siang ding van kumpipa

ahihi. Vantung mite in tuu cingte kiang ah bawngkuang

sung a naungek Zeisu in “Khazih Topa, honkhiapa” hi cih

thu tangko hi.” (Luke 2:11, NKJV).

Tua ban ah, “Pasian Tapa” in Too Pasian sung a ama

mun zong hong lak ahihi. Hih min in hih leitunga Zeisu

hong om sunga Pa Pasian leh Zeisu kikal akinaizia hong

thei sak min zong ahihi.

Pa leh Tapa kikal kinaina pen ei leh Pasian kikal

kinaizia tawh kibang lo hi. Ei kinaina pen piangsakpa leh

honkhiapa hihna tawh hong sep sakna tungtawn a ih ngah

thu ahihi. Zeisu pen Pa tawh akinaizia ah akikim, tawntunga

aom khawm ahi uh hi. Too sung a kihel hihna tawh Zeisu

pen Pa tawh kinai diak hi.

“Zeisu in van a om Ka Pa” acih ciang in, mihing ahih

hang in van Pasian tawh pum khat ahihna nungzuite aphawk

sak ahihi. Amah in amaute tawh thuak khawm in athuaknate

uh ah ahehpihpa zong ahihi. Too Pasian hihna hang in

tawntung pa tokhom tawh kizom hi. E.G. White, Khangcin’

Lunggulh, D.A. p. 442.

Zeisu Pasian ahihna in ei ading in bang khiatna nei

hiam? Hih thu in khiatna tampi nei hi. Lamdang asak huai

pen thu in Zeisu pen Pasian kim lai mite mun ah akipiak

theih nang in hong kiniamkhiatna thu ahihi. Hih mun ah

Pasian agen ih hihi! Hih thumann in Pasian taktak ahihna

eite ading in bang alamdang lametna hong nei sak hiam?

NITHUMNI (Tuesday) Apr. 14

Mihing Tapa (Luke 6:5)

Zeisu in Pasian Tapa leh mihing Tapa ahihna thei tel

mahmah hi (Luke 22:67-70). Ahi zong in “mihing tapa” cih

min deih diak hi. Midangte’n tua min tawh sam lo uh hi.

Stephen thugenna (Sawl. 7:56) tua min akizatna mundangte

in Mang. 1:13 leh Mang. 14:14 te ahihi. Midangte’n zatpih

lo hi. Hih kammalte lungdamna thubu sung ah 80 vei val

leh Luke thubu sung bek ah 25 vei kimu thei hi. Luke in

hih kammal azatnate ah Zeisu pen Pasian in hotkhiatna

thupha tangko ding a Pasian sawlpa cihna lungdamna tawh

agen ahihi.

“Mi bang a hong piang Pasian Tapa cih thu in eite

ading in kicing kim hi. Hih thu in Khazih tungtawn leh

Khazih tawh eite hong henkhawm khauzang bang ahihi. Hih

thu in ih sin toh den ding thu ahihi. Khazih pen mi taktak

hi a, mihingte bang a hong kiniamkhiat nopna thu hong lak

hi. Amah pen mihing cilehsa apua Pasian zong ahihi. E.G.

White, Teltuam Thupuakte, 1 SM. p. 244.

Luke in “mihing tapa” cih kammal azatna tawh

apiandang ama pumpi, zialehtong, amasuan, leh Zeisu

mailam hun cihte hong ngaihsun kha thei sak hi.

Amasapen ah, tua min in mihing ahihna lak a, leitung

minlehpuam pha nei lo hi (Luke 9:58).

Anihna ah, tua min in Zeisu pen Pasian ahihna zong

kawk hi. Bang hang hiam ci leh “mihing tapa in Nipini’

(Sabbath) Topa ahihi” (Luke 6:5, NKJV). Tua hi a Amah in

piangsakpa, maisak theihna vang nei pa ahihi.

Thumna ah, leitung pian ma a Too te ngaihsutna sa

apicing sak ding in Zeisu hong pai ahihi (Eph. 1:3-5). Tua

hi a mihing Tapa in amangte zong ding gum dinga hong pai

ahihi (Luke 9:56; Luke 19:10). Ahi zongin hih hotkhiatna

thu pen “Mihing Tapa in thu tampi thuak in sihna thuak a

ni thum ni a athawhkik khit mateng picing thei nai lo hi”

(Luke 9:22, NKJV). Mihing Tapa in atot ding lampi atheih hi

a, mihingte hotkhiat nanga apiak ding manh zong atheih sa

mah ahihi. Hih thu in hotkhiatna vai gelna vai ah Khazih

mi bang a hong kipum piakna thu hong lak hi.

Alina ah, Luke in hong lah haksatna teng athuak

Messiah omzia teng kician mahmah a: singlamteh atel theih

zia (Luke 18:31 - 33), akizuakna (Luke 9:44), genkholhna’

tangtunna ahi ama hong sihna (Luke 22:22), singlamteh a

hong kikhailupna leh athawhkikna (Luke 24:7 leh Luke 11:30

saikak in la), Pasian leh mite kikal a palai na asepnate

ngaihsun in.

Angana ah, Luke in mihing tapa pen leitung bei ciang

a misiangthote thamanh pia ding leh kikingkalhna ma hial

dinga hong pai nading thute acing in hong mu thei sak hi

(Luke 9:26; Luke 12:4; Luke 17:24, 26, 30; Luke 21:36;
Luke 22:69).

Atom in en leng “mihing tapa” cih kammal ah Khazih

kua hi a, bang hih ding a hong pai a, bang teng bawl a,

hotkhiatna vai tawh kisai bang teng sem ding bang teng

hong sep sak ding cih thute kawk hi.

NILINI (Wednesday) Apr. 15

“Pasian’ Khazih” (Luke 9:18-27)

Luke 9:18-27 sim in. Adawnna ding uh atheihsa

anungzuite kiang ah bang hang in dong ding ahi hiam? Ama

thu leh amau nungzuih manh bang ahilh nuam hi ding hiam?

“Kei kua hi hong ci na hi uh hiam?” (Luke 9:20,

NKJV). Kum 2000 ma Zeisu dotna pen tu dong mah a ih

dawn ding hi den hi. Mi tuamtuamte’n dawnna tuamtuam

pia ciat uh a; sia lianpipa, mihon vai thu telsiam, thumann

thutak gena aneipa, akipumpiak a etteh huai, lau anei lo

kamsangpa, kipawlkhopzia puahphapa, vai khempeuh ah

etteh tak cing hi. Tua dotna i dawnna ding diktak pen Peter

kam pan hong pusuak hi.

Zeisu in pianngei tung a athuneihna hong lak hi (Luke

8:22-25), (aneu 26-35), natnate azawhna, (Luke 5:12-15;

Luke 8:43-48), bangmahlo mai tawh mi 5000 avakna (Luke

9:13-17) sihna tung ah agualzawhna (Luke 8:51-56) cihte

ahihi. Tua ban ah, Zeisu in anungzuite dotna 2 donga :

Amasa pen ah, mi te’n Amah angaihsutzia hi in; tua khit

teh anungzuite’n Amah angaihsutzia uh ahihi. Atheih loh

uh adong hi lo hi. Amaute’n atel siam nang a avek a akipiak

uh akul ding lam athei sak hi zaw hi.

“Zeisu ih theihna pen gensawn pan hi theilo hi. Mi

ngaihsutzia namkim thei kha mah ni. Christian thu mite

ngaihsut khit khempeuh zong thei kha mah ni. Mi muan

tampite ngaihsut-ziate ban gen thei in Christian ki hi lo thei

hi. Christian hihna pen Zeisu thu theihna hi ngei lo hi.

Zeisu ih theihna hi den hi. Zeisu Khazih in mi khatsim’

khentatna kulsa hi. Zeisu in Peter bek dong lo hi. Ih vek a

hong dong hi a: nang’ kei hong koici muh, hong koici

ngaihsut na hi hiam?” aci ahihi. - Adapted from William

Barclay, The Gospel of Matthew, (Bangalore: Theological

Publications in India, 2009), Vol. 2, p. 161.

Zeisu hong dot thu ih dawnna pen Peter agenna sang

neu zaw thei lo in: Zeisu in “Pasian’ Khazih” ahihi (Luke

9:20, NKJV). Khazih khiatna pen “sathau nilhpa,” Messiah,

anasep masuan pen gupkhiatna hi a, Satan letcipna mawhna

pan suakta a dikna thu ah nuntakna ahihi.

Zeisu kua hiam? cih ih theih bek kicing lo hi. Ei ma

ading in ih theih kul hi. Zeisu thei ing na cih leh - Ama thu

bang teng thei a? Nang theihna in Ama thu bang hong hilh,

kua ahih lam hong hilh hiam?

NINGANI (Thursday) Apr. 16

Mel Kilamdanna (Luke 9:27-36)

Lungdamna thubu 3 te sung a mel kilamdanna sim

kim in (Luke 9:27-36, Matt. 17:1-9; Mark 9:2-8). (Tua thu

vai Peter’ hong genna, leh ama mit muh teci hong genna; 2

Pet. 1:16-18 sim in). Luke in bang hong gen beh a, tua thu

bang hang in thupi hiam?

Luke in apatna lam Matthew leh Mark gente sang

kim zaw in: Zeisu in Peter, John, leh James te mualtung ah

thungen ding in paipih hi. Zeisu in Jerusalem lam nga in

mailam a athuak ding thute genkhol hi. Zeisu in ama septe

Pasian sep sak nop te hi sak nuam hi. Tua bang hun lai tak

in, thungetna pen Pasian deihna telkheh theihna omsun

ahihi. Thungetna tungtawn in Zeisu tung ah van vangliatna

hong kibuak hi. Amel hong kilamdang hi. Apuan te khuaphia

bang hi (Luke 9:29, NIrV).

Vangliatna adim Zeisu pen Moses leh Elijah tawh

“Ama sih ding vai, Jerusalem a asih baih ding vai” gen uh hi

(aneu 31, NIrV). Hih mun ah si, paikhia cih thu pen thu 2 in

pai a: amasa pen ah Jerusalem a asih ding vai ahihi. Ahi

zongin Greek kam tawh hih “Exodus” pen sihna genna hi lo

hi. Anihna ah tua “Exodus” pen Zeisu in Jerusalem a sihna

tung ah gualzo a mite asuahtak sak ding thu agen ahihi.

Tua thumte kimuhkhopna (Zeisu, Moses leh Elijah)

pen van pan a aw tawh kikhumm a, “hih in ka it ka Tapa hi.

Athu ngai un!” (aneu 35, NKJV). Tua mel kilamdanna in

Zeisu vangliatna pulak a Pasian Tapa ahihna ki gen kik in

hotkhiatna in Tapa’ nuntakna sawngg ding cih thu tangko

hi. Tua hi a, nungzuite kiang a van pan a thu piak in: athu

ngai in athu mang un. Thuman’na leh cihtakna lo tawh,

nungzuihna om thei lo hi.

E.G. White in Moses leh Elizah vai agenna ah, “ Zeisu

tawh Atuahsiat ding vai holim khawm ding in vantung mi

tokhom tung a tu kuama peuh te sang in tel zaw uh hi. Van

pan a panpihna, thuakpihnate tawh hehnem ding a hong

pai ahi uh hi. Leitung’ lametna, mi khempeuh hotkhiatna

vai pen amau’ kikamkup thu ahihi.” E.G. White, Khangcin’

Lungguh, D.A. p. 425). Zeisu nangawn, mi tampi te ahehnempa,

hehnep kisam hi. Hih thu in ih makaipite, siate, leh

lamlakte zong khat veivei hehnep, hanthot, midangte’ huhna,

panpihnate kisam thei uh hi. Tua bang na theih tu in kua

om hiam?

KIGINNI (Friday) Apr. 17

SINBEH DING: “Khazih mihing ahihna vai telkhialhna

apiang sak thei ding dotna, genna khempeuh pell in.

Thumann pen upmawh sansat tawh kinai mahmah hi. Zeisu

pen mi bang a ih gen ciang in mi khat lah hi a Pasian lah ahi

veve pong bang in na kammal zat te akitelkhialh loh nading

in kidawm in. Gentehna in, hong suah hong pianna pen

Pasian nalamdang ahihi. Khazih sung ah mawhna tawh

kipawl bangmah om ngei peuhmah lo in mawhna sung ah

them zong kisawh kha lo hi. Mi bang, eite mah bang in

khialkhemna thuak a ahi zong in “asiangtho” ci in kisam hi.

Eite bang a ki koici ze-et in khialkhemna thuak thei mawk

ding a, mawh bang peuhmah lo ding cih bang bang ci pian

thei ding. Khazih mi bang in hong piang a mi hi paisuak

ding hi cih pen lamdang lua hi, thu lamdang hiden ding hi.”

E.G. White, Comments, 5 B.C. pp. 1128, 1129.

KIKUP DINGTE:

1. Hih atung a E.G. White lai at Khazih’ mihing pianzia sim

in. Zeisu’ Pasian pianngei leh mihing hihna in alian thumann,

ih telsiang zawh ngei loh ding thu ahihi. Akigelh

mah bang in “mihing hi den lai ding a, telsiang zawh hi

thei ngei lo ding hi.” Hih “thu thuuk” ei theih dana atheilote

tung thu khen mang ih sep khak ding bang hang in kidop

kul ding hiam?

2. Mel kilamdanna mual a thupiang ngaihsun in. Amah

tawh hong pai teltuam nungzuite in bang bawl masa uh

a? Ihmu! ei zong hotkhiatna vai thulianpi, Zeisu

kumkikna hun ma deuh in tua bang mah a ihmu khate

maw?

3. Zeisu in Ama thu agenna pawl khat sim ni. Zeisu pen mi

thupi khat, kamsang lian khat, ahihkeh kha lam makaipi

khat, bek a ngaihsut khak pen bang hang in khial hiam?

Amah mah kikhem cip, mi amkham khat bang in bang

hang ngaihsun lo ding? Zeisu in Zeisu ahihna pan khel

theih ding, ih tel theih dang om thei lo hi.